بايرام پايي

بايرام پايي

بوگون بايرام آخشامي دير، 1391-نجي ايل ده پيس-ياخشي يوك-يابيسيني ييغيشديردي.. نه­لر اله گتيرديك بو ايلده نه­لر ده ايتيرديك.. حيات يئنه ده داوام ائدير.. داوام ائده­جك ده، بيز اولساق دا اولماساق دا.. نه ياخشي ائله داوراناق كي اولماديغيميزدا اولماغيميزا داريخان اولسون.. گلين يئني ايلي يئني ياخشيليقلارلا باشلاياق، يئني اوميدلرله باشلاياق.. يئني چاليشمالارلا باشلاياق.. يئني پالتار، يئني باشماق، يئني آفتامابيل، يئني ائو، يئني ائو اشيالاري آلانماساق دا يئني اوره­ك، يئني باخيش و باشقا يئني معنوي ديه­رلر هئچده پول-پارا ايسته­مير!.. آلله كريم­دير.. «آخي دونيا فيرلانير»... «هرشئي-هرشئي اولا بيلر، ميخي ميسمار ائلييه­ن وار»..

يئني ايلي، اوغوز بايراميني، ديريليك بايراميني، تزه­ليك بايراميني، اويانيش بايراميني سايين وطنداشلارا، اوخوجولارا، قلمداشلارا و آرخاداشلارا تبريك ائديرم، ساغليق، ياراديجيليق، مهربانچيليق، بوللوق، اوجوزلوق و بوتون ياخشيليقلار و گؤزلليك­لر آرزوسو ايلا.

اي كؤنوللرده، گؤزلرده دئوريم يارادان

اي گئجه-گوندوزلرين تدبيريني تؤكن

اي حاللاري حالدان حالا ساليب ده­ييشديرن

بيزيم حاليميزي، كئفيميزي ان ياخشي حالا سال بو يئني ايلده. آمين.

كتاب تانيتيمي

 سون گونلرده - 1391- نجی گونش ایلی نین قیش فصلینده- عزيز دوستوموز، اردبیل لی تانینمیش شاعر عظیم غلامعلی پور (سحر) جنابلاري نین بیرینجی شعر توپلوسو «شله!» باشلیغی آلتیندا تهراندا نشر ائدیلدی. 112 صحیفه دن عبارت شله کتابی رقعی اؤلچوسونده و 1000 نسخه ده، مؤلفین اؤز تشبوثو ایله یاییملاندی. سايين سحر دوستوموزو تبريك ائده رك سيز عزيزلري بو كتابي الده ائديب اوخوماغا چاغيريريق.

زبان مادری در مجلس

نماینده مردم قروه در صحن مجلس : تدریس زبان کردی در مدارس

 

نماینده مردم قروه در صحن مجلس : تدریس زبان کردی در مدارس

 

 

به گزارش خبرنگار پارلمانی خبرگزاری فارس، حامد قادرمرزی نماینده مردم قروه در مجلس شورای اسلامی پیش از ظهر امروز (سه شنبه) در نطق میان دستور خود در صحن علنی اظهار داشت: در حال حاضر بزرگترین مشکل کشور در عرصه اقتصادی، گرانی، بی ثباتی بازار، تورم و بیکاری است که تمام اقشار و گروه های جامعه را دچار مشکلات عدیده کرده و شدت آن در مناطق محروم و استان های مرزی بیشتر از سایر نقاط کشور است.

وی با بیان اینکه روز سوم اسفند، روز جهانی زبان مادری است، اضافه کرد: کشور ما یک کشور چند قومیتی است و تعداد و تنوع زبانی در کشور ما یک سرمایه، نه یک بدهی، بلکه یک فرصت است نه یک تهدید.
قادرمرزی گفت: لازم است تا به منظور انسجام و همگرایی بیشتر اقوام ایرانی، مقابله با تهاجم فرهنگی غرب و بیگانگان، حفظ و صیانت از میراث مشترک ملت و انتقال آن به نسل آتی و تحقق آرزوی دیرینه ایرانیان در قالب اصل پازدهم قانون اساسی فرهنگستان زبان های ایرانی به ویژه کردی، تدریس و آموزش زبان های ایرانی در مدارس و تدوین کتب آشنایی با زبان های ایرانی برای تدریس در تمام مدارس کشور ایجاد شود.

منبع و لینک :http://varzqan.blogfa.com/post-1466.aspx

آناديلي گونو

"آناديلي گونو"دور..

بو يالاندير، دوغروسو

آناديلي "گونو"دور

هده له نير، قووولور

اوغوم-اوغوم اوغولور...

هئچ گئتمه­ميسن كييييي!!

دئديلر گئتميسن..

   آغلايان كيم

       سيزلايان كيم

          باياتي چكن كيم

             آغي دئيه­ن كيم...

آمما

سن

مندن يان اولمادين هئچ

    قاباقلار سایاق تكليكده گؤره­جه­يين

        گوندم ايشلرين دالينجا دا

             گئتمه­دين بئله

سن

گئتدییین گوندن -دئییلنلره گؤره- بري

مني

ناچارلیقدان يالنيز بوراخديغين آنلاردا دا

   بوراخمادين

         بوراخماييرسان

            بوراخاماياجاقسان

گؤزياشلاري آلداديجي اولسا دا

     دئيه­نلر

           نئجه ده يالان دئييرلر

سن

    هئچ گئتمه­ميسن كيييي !...

19/11/91

عاشورا زیارتی..

غاشورا زیارتی و توسل دعاسی تورکجه ترجمه ایله

حؤرمتلی سحر جنابلاری نین وئبلاقیندا

http://qulamalipursahar.blogfa.com/post/19/%d8%af%d9%82%d8%aa-%d8%af%d9%82%d8%aa

http://www.daniznews.ir/index.php?option=com_content&view=article&id=355:booke&catid=10:newsflash

قطع  : جيبي

صحيفه: ۶۴

 

 

چیلله

سایین دوستلار، قلمداشلار  و اوخوجولار

چیلله گئجه­نیز مبارک و قوتلو اولسون

اوره­کلرینیز ایستی، عؤمرونوز اوزون اولسون

آغزی­نیز شیرین، یاشامینیز دادلی اولسون

باشقا بیر یازی حاضیرلایانمادیم چیلله­یه اویغون، یالنیز دوستلاردان گلن چیلله مئساجلاریندان بیر نئچه­سینی سیزله پایلاشیرام:

پاییز گئدیر قیش گلیر

چیلله گلیر خوش گلیر

بوگون بازارا گئتمه

گئدن جیبی بوش گلیر !

***

پاییز گئدیر سونرا بوران، قار گلیر

سوفره­لره حالوا، قارپیز، نار گلیر

چیلله گئجه ائل-اوبانی شاد ائدیب

بیزیم یوردا ائیله بیل باهار گلیر

****

قیشین قارلی اولسون ایستی اورکله

حیاتین یاز کئچسین گول­له، چیچک­له­

دئیه­سن- گوله­سن قارابیرچک­له

چیلله آخشامیندا، اوزون گئجه ده..

***

چای چایداندا داغ اولسون

ایچ داماغین چاغ اولسون

شادلیق سنه یار اولسون

دوشمنلرین خوار اولسون

اوزون گئجه­ن شاد اولسون

غم-غوصه برباد اولسون

****

چیلله گلیر قارینان

قارپیزینان، نارینان

هامی دوستلار خوش اولسون

یولداشینان، یارینان

*** 

چیلله گئجه گلیب بیزیم ائللره

شاد نغمه­لر دوشوب بیزیم دیللره

اوزون گئجه حالوا، قارپیز یئییرم

دوستلاریما موبارکلر دئییرم

***

ساوالان یئلی اسدی

شاختاسی منی کسدی

گؤزلریم سنه قوربان

ساغلیغین منه بسدی

***

بو بیر بایاتی دا اؤزومدن:

چیلله قارا باغلی دیر

آلما، نارا باغلی دیر

کؤنلوموزون شادلیغی

دوستا، یارا باغلی دیر

*** 

زلزله14

گای کئچدی

 

گلدي دئپرم، گونوموز گون­به-­گون آخ-واي كئچدي

چئوره­ميزدن دلي­سوو هوي كئچدي، هاي كئچدي

       بيري­نين آرزيسي قويلاندي قارا تورپاقدا

       بيري­نين­سه امه­يي اولدو بوتون زاي كئچدي

بيري چيرپيندي، دؤيوندو آناواي سؤيلركن

بيري اؤز كؤرپه­سينه اوخشادي لايلاي كئچدي

      بيري چيخدي دئدي هئچ قورخمايين، ايشلر دوزه­لر

     اوبيري سؤيله­دي خوش گونلرينيز داي كئچدي..

بيري يئردن گليبن باخدي دا جان يانديردي

بيري گؤيدن بيز اوچون ائيله­دي باي­باي كئچدي

     جوربه-جور نيّت­ايله تاپدالانان يوللاردان

     هم دلي، همده عاغيللي، همي ده خاي كئچدي

اؤلكه­نين هر طرفيندن گله­لي يارديملار

بئشينه چاتماسا دا دؤردونه پاي-پاي كئچدي

      موشگولو چؤزمك اوچون، كلله­لرين يوردوندا

      بوللو-بوللو جلسه اولدو، قورولتاي كئچدي

دئديلر بير آيا ائولر تيكيلير، غم چكمين

ائو تيكيلميب­سه نه وار كي، هله دؤرد آي كئچدي!

      هله قيش، شاختا، بوران، سرت شپه­لر كئچمه­سه ده

      تيتره تير-تير چادير ايچره بئله وارساي*، كئچدي!

بوردان «عليار» كئچر اولسان گؤزونو يوم سن ده

قوي دئسينلر نه قشه­ح(قشنگ) گاي گلدي گاي كئچدي!..

24/9/91

 * وارساي : فرض ائله

سئوگیلیمین

ساليب صفاني صفادن صفاسي سئوگيليمين

ائديبدي چوخلاري مجنون جفاسي سئوگيليمين

چكيبدير آغ گونه دوغرو ايلاهي كروانيني

دالينجا زولفونون هردم قاراسي سئوگيليمين

گليبلر عشق ايله قوربانلاري كسيلمك اوچون

اولوب وصل وعده­گاهي ميناسي سئوگيليمين

آل-الوان چيچكلر آچيب قلم- قلم بوتالار

قيزيل ناخيش بزه­نيب كربلاسي سئوگيليمين

سولوب سوسوزدان آليشميش او پارچا- پارچا اولان

دوداقلاريندا گؤيرميش دوعاسي سئوگيليمين

كده­رليدي يئر-گؤي، قهرليدي دوشمن، يالنيز

گولوب جمالينا خنجر ياراسي سئوگيليمين

نه غم كي سس وئرن اولموبدو هل من ناصرينه

دئدي لبيك اؤزو گؤيدن خداسي سئوگيليمين

حميدي! تا نه قده­ر ايشله­يير قده­ر قلمي

جهاندا شرح اولونار ماجراسي سئوگيليمين

ارديبهشت/1380

 

 

بولوت

آشاغیداکی شعری شاعر دوستلاریمین بیری ایله، بیر پاییز آخشامی یاغیش دنه­لری­نین روح اوخشایان سسینی دینله­یه­رک بداهه اولاراق یازدیق، دیرناجیق آراسینداکی مصرع­لر او دوستوموزدان دیر.

بولوت

گؤیدن گلدی بیر آغ آتلی

«قان دیمدیکلی، سو قاناتلی»

«ماهنیلاری تاتلی-تاتلی»

او آغلادی.. من آغلادیم ...

          آی، اولدوز، گوندن دانیشدی

          گؤوده­یه تیندن دانیشدی

          یئرین بوش!.. سندن دانیشدی

          او آغلادی.. من آغلادیم...

لاپ ایچیمه دولدو سسی

ایچین-ایچین هؤنکورمه­سی..

ایسلاندیقجا یار هوسی

او آغلادی.. من آغلادیم...

          گل گئدک -دئدی- یاز اولاق

          تورپاغا، داشا یازیلاق

          دویغولاندیق زولاق-زولاق

          او آغلادی.. من آغلادیم...

 

 

قوربانلیق !

"قوربان بایرامی بوتون مسلمانلارا و سایین اوخوجولارا قوتلو اولسون".

حؤرمتلی دوستلار و قلمداشلار ! بیرجه-بیرجه وئبلرینیزه گلیب تبریک ائده­بیلمه­دیییمدن عذر  ایسته­ییرم.

قوربانلیق

ساچلاری­نین شوه­لیییندن

                     بیر چکیم سورمه

                           چک آیریلیقدان آغارمیش گؤزلریمه.

گؤزلری­نین دنیزیندن

               بیر ایچیم ایچگی

                        ایچیر یانغی دوداقلاریما.

دوداقلاری­نین الوان بویاسیندان

                          بیر یاخیم گولوش

                                یاخ سولغون باخیشلاریما.

باخیشلاری­نین دوزلاغیندان

                            بیر دادیم دوز

                                 یالات آلیشقان کؤنلومه.

و کؤنلونون دورولوغوندان

              بیر باخیم گوزگو

                          آس آلنیمین نقطه­لنمیش یازیسینا !

اوندان، یاپاجاغینی یاپ..

آخی

    بیزیم «علیار»دا،

          قوربان اؤلدورمه­یین عنعنه­لری وار، گیله­سی!..

اکبر حمیدی علیار(علیار)

4/8/91

 

قارا مجموعه

قارا مجموعه ایله تانیش اولماق ایسته ینلر آشاغیداکی لینکی تیکلاسینلار :

http://duzgun.ir/moarefi/038.php

ربان مادری یا زیان رسمی؟!

نقدی بر کتاب درسی جدیدالتالیف فارسی ششم ابتدایی

(به قلم دکتر مرتضی مجدفر)

http://mortezamajdfar.blogfa.com/post/15

آی باشی

آیین اوچونجو گونوندن آی باشینی گؤزله ینلره هدیه اولونور ...

آی باشی

داریخما سیزلاما گولوم غمین قوتاری آی­باشی

دؤزوبسن اییرمی گون ده دؤز! داغیت فیشاری آی­باشی

زهه­ر باهالیغین الی پولاد حصار هؤروب سنه

گؤتور حقوق ناجاغینی یار بو حصاری آی­باشی !

باش-قولاغین دا ، بللی دیر، ایتیب توزوندا یوخلوغون

بیر نئچه گون ده کی اولوب سیل بو غوباری آی­باشی

باشین گؤرنده باققالین میس یئره بیر تهه­ر اکیل !

توتارسان آلله ایسته­سه باشین یوخاری آی­باشی

قیسط آپاراندا وئرمه­یه آیلیغی باسگینن جیبه

بیر آی بو بوش قالان جیبین قوی شیشه باری آی­باشی !

قوناغین ایسته­سه گله عذر گتیر، بهانه دوت

دیلین توتارسا سؤیله کی گل بیزه ساری آی­باشی

قالسا یادیندا عونوانی قصابا گئت پوز ایلا دئه:

باغیرساغین آلاجایام، کس بو داواری آی­باشی !

اوشاقلارین باشین، چالیش ناغیل­لا، تاپماجایلا قات

یئیه­للـه پالدا-بستنی، آلما، خیاری آی­باشی..

خالق نه دئییرسه قوی دئسین، قورخما، اوتانما، گئت دؤشه،

رئستورانین اؤنونده­کی باغدا، ناهاری آی­باشی !

خانیم دا، والله، حاقلی دیر.. کوسوبدوسه سن اینجیمه

یقین سئویندیره­ر فیشین سئوگیلی یاری آی­باشی !

سوسما! دیلین کی وار.. دانیش.. آلانماسان دا وعده وئر ،

کی گزدیره­جه­یم سنی راستابازاری آی­باشی !

اینیجیمه، کوسمه آی خانیم ال-اله وئر منیمله گل

گومان گئدیر کی دولدوراق بوش چالالاری آی­باشی !

باشلا یاواش-یاواش آریت بوزلارینی فریزئرین

دولدوراریق قوجاق-قوجاق گؤی تره­باری آی­باشی !

بیرده یامان گؤز ائو ییخار، نایلون الیمده گؤرجه­یین

بیر نئچه کند اوزه­ررییی سال، سنی تاری، آی­باشی !

بو فوت و فن ایله کئچیر گون-گوذرانی «علیار»ین

بللی دئییل اودوزا یا اودا قوماری آی­باشی...

 

اکبر حمیدی علیار- ۱۳۸۵

پوللو ترافیک

پوللو ترافیک !!!

ائویمیزدن ایش یئریمه قده­ر 22 کیلومتردیر، هرگون بیر ساعاتدان بیر ساعات یاریما کیمی چکر منیم ایشه گئتمه­ییم همی ده قاییتماغیم، شولوغلوق و ترافیکه اؤیره­شدیگیمیزه رغمن هردن ده عصبی­لشیریک، بعضاً ده کتاب-زاد اوخوماقلا و یا دوستلارا مئساج یازماقلا باشیمیزی قاتیریق یول اوزونو؛ نئچه گون اؤنجه، ائودن چیخدیقدا فرقلی بیر ترافیک ایله قارشیلاشدیق، بو دؤنه قاباقدان گئدن ماشینلار گئری قاییتمیش بیزه ده –گئتمه­یین، یول باغلی­دیر-اشارت ائدیردیرلر، بیز ده قاییتدیق باشقا بیر کوچه­دن گئتدیب چیخدیق باغلانان خیاوانین او بیری باشینا، ماشیندا اوچ نفر ایدیک، هره­میز ترافیکه و شهرین شولوغلوغونا گؤره بیر سؤز دئدیک، آنجاق باغلی خیاوانین باشینا چاتاندا غیرعادی بیر آخار-باخارا توش گلدیک، او دا ترافیکین انسانلار طرفیندن یارانماسی ایدی ! یعنی یوزلرجه یازیق انسان ! یولو کسیب ترافیک تؤره­تمیشدیرلر، بیز ده باشقالارینا تای ماراقجیل اولوب ازدحامین سببینی اؤیره­نک دئیه، نئچه نفردن آخینین نه اولدوغونو سوردوق و چوخ شئیلر اؤیره­ندیک !!:

سؤزو گئدن خیاوانین باشیندا بیر قرض­الحسنه صاندیغی وار ایمیش، قاراباخت انسانلار اؤدونج پول (کرئدیت- وام) آلماقدان یانا، دیل­سیز-آغیزسیز پوللارینی بو صاندیقدا یاتیرمیش ایمیشلار(دوغروسو باتیرمیش ایمیشلار) کی صاندیق دولوب داشان کیمی صاندیغین حؤرمتلی ایشچی­لری او پوللاری جیبلرینه بوشالدیب صاندیغی باغلاییب قاچمیشدیرلار، دئییلنلره گؤره یالنیز صاندیغین چایچی عمیسی 450 میلیون تومن آپاریب !!.. بیز ده قولاق گوناهکاری­ییق هااااا !! یوخسا من اؤزوم هئچ بونا اینانماییرام! آخی او بئله پولو جیبه یئرلشدیمک اولارمی؟!..

خلاصه بو اولایین سونراسیندان خبریمیز یوخدور آنجاق پولو گئدن باجی-قارداشلاریمیزا بونو دئیه بیلریک کی اصلا نیگران اولمایین و آرخایین اولون او پیس آداملار ، ائله باخ بوگوندن، بانک خدمتلریندن محروم اولاجاقلار و سیز پولونوزا چاتاندا اونلار دا جزالارینا چاتاجاقلار!!!

اکبر حمیدی علیار

دیل و مدرسه

اوخوللار آچیلدیلار،

                 آما دیلیمیز....

بلکه گلن ...

بلکه ده...

اه بابام، اصلن دیلی نئیله ییریک !

         آخی ادبلی شاگیرد مدرسه ده هئچ دانیشارمی؟!!....

اکبر حمیدی علیار

زلزله13

هامینی بزه ر  اؤزو لوت گزر (واجبلرین واجبی)

قره­داغ بؤلگه­سینده باش وئرن دئپرمین ایلک گونلریندن ائشیدیب بیلن چوخلو دوستلاردان، مختلف شهرلردن و حتی خارجی اؤلکه­لردن منه منّت قویوب زنگ آچیب وضعیتی و اؤزللیکله ده بؤلگه ده یاشایان قوهوم-اقربانین حالینی سوروشوبلار، آنجاق ماراقلی­سی بوردادیر کی تلویزیوندان خبرلری ایزله­ین بو دوستلار و همکارلاریمیز(تهراندا) هر نه­دن اؤنجه مندن – بس نییه سیزین منطقه­ده بوتون دام-داشلار پالچیقدان دیر؟- سوروشوبلار، من ایسه       بیلمه­میشم نه جواب وئریم!.. هرحالدا بو اولای قره­داغ منطقه­سی­نین یوخسوللوغونو (قیزیل و میس معدنلرینه مالک اولدوغو حالدا) و مظلوملوغونو (قوچاقلار اوجاغی اولدوغو حالدا) و هامینی بزه ییب  اؤزو لوت گزمه یینی   بیلمیه­نلره ده بیلدیردی..

ایندی لازم و گرکدیر کی بوتون مسئول اورگانلارین امکداشلیغی ایلا،          او جومله­دن وزارت مسکن و شهرسازی، نظام مهندسی استان، بنیاد مسکن، استانداری، فرمانداری، شهرداری، بانک مسکن، بانک کشاورزی، کمیته امداد و ... نه تکجه دئپرمده داغیلمیش  و صدمه گؤرموش ائولر بلکه بوتون پالچیقدان یاپیلمیش کند ائولری و بینالاری اوچورولوب و یئنی اصولدا و قئییم ماتریاللارلا (هئچ اولماسا 7 ریشتئر زلزله­نین داوامین گتیرن) تیکیلسین و بو ایشده اهالی­، دستکله­نمکله(وام، مصالح و ..) نه تکجه تشویق بلکه بو ایشه مجبور اولسونلار، بو ایش واجبلرین واجبی دیر.. بئله­لیکله کندلریمیزین هم آخار-باخاری گؤزل اولاجاق، هم یوخسوللوق توزو منطقه­نین اوزوندن سیلینه­جک، هم کندده اوتورانلار اؤز یاشاییش محیطیندن لذت آلیب هوسله چالیشارکن نئچه قات آرتیق محصولات یئتیره­جکلر ، هم شهره کؤچمه­یین قاباغی آلیناراق شهرده­کی عالی تحصیللی جوانلار  دا کندلرده سرمایا قویوب اکینه­جک، باغدارلیق، مالدارلیق و باشقا ایشلری علمی و صنعتی شکیلده یئنیدن برپا ائده­جکلر، همی ده بینالارین محکم­لشمه­سی ایله گله­جکده باش وئره­جک بئله­نچی حادثه­لرین قاباغی آلیناجاق و بیر کلمه­ده بؤلگه، لاییقینجه آبادلاشاجاق..

اکبر حمیدی علیار

زلزله 12

زلزله‌اي به بزرگي 4.3 ريشتر، بار ديگر ورزقان را لرزاند /یکم شهریور

 

زلزله‌اي به بزرگي 4.3 ريشتر، بار ديگر ورزقان را لرزاند

رخداد شش پس لرزه ديگر از بامداد چهارشنبه تاكنون، مناطق زلزله زده اهر و ورزقان را لرزاند.
 
به گزارش ايسنا، از بامداد چهارشنبه اول شهريورماه تا زمان مخابره اين خبر، شش پس لرزه به ترتيب با بزرگي 3.2، 2.5، 2.8، 2.9، 4.3 و 2.9 در مقياس امواج دروني زمين، حوالي اهر، ورزقان و بخشايش در استان آذربايجان شرقي را لرزاند.
 
زلزله 4.3 ريشتري كه بزرگترين پس لرزه ثبت شده از بامداد روز چهارشنبه بود در ساعت 9 و 58 دقيقه و 34 ثانيه بامداد در 9 كيلومتري ورزقان و 31 كيلومتري اهر و درعمق 8 كيلومتري زمين به وقوع پيوسته است. دو زمين لرزه به بزرگي 6.2 و 6 در مقياس امواج دروني زمين، 21 مرداد ماه جاري اهر و ورزقان را لرزاند كه در پي رخداد آنها تاكنون ده ها پس لرزه با بزرگي مختلف در منطقه به ثبت رسيده است.

زلزله 11

اوروج بایرامی یولدان یئتیشدی بیر حالداکی قره­داغداکی وطنداشلاریمیز هله اؤزلرینی تاپماییبلار.. بیرحالداکی بیرچوخ آتا-آنالار بالالاری ایلا و بیر چوخ اوشاقلار آتا-آنالاری ایلا و بیر چوخ گنجلر سئوگیلی­لری ایله بایراملاشماق اوچون قبرستانا گئتمه­لی دیرلر بوگون...

ایستیرم دئیه­م فطر بایرامینیز مبارک و قوتلو اولسون آما ایچه­ریمده بیر اوتانجاقلیق، بیر کده­ر و بیر آغیر آغری بو سؤزو دیلیمه گتیرمکدن چکیندیریر منی، آخی قره بایرامی نئجه تبریک ائتمک اولار؟!!.. آنجاق دئیه بیلرم عزیز اوخوجولار و آذربایجانلی­لار ! اوروج-نامازلارینیز حق درگاهیندا قبول اولسون، گلین بو قره­بایرامدا مصیبت گؤرموش وطنداشلاریمیزی اونوتمایاق، الیمیزدن گلن یاردیملارلا..

اکبر حمیدی علیار